မြန်မာရဲ့ အင်္ဂလိပ်စာ ကျွမ်းကျင်မှုအဆင့် ဘယ်လိုရှိသလဲ

မြန်မာတွေကတော့ အာဆီယံဒေသအတွင်းမှာ သူတို့ရဲ့ အင်္ဂလိပ်စာ ကျွမ်းကျင်မှု အဆင့်ဟာ မြင့်မြင့်မားမား မှာ ရှိနေတယ်လို့ ထင်တတ်ကြသလို ဒေသတွင်းနိုင်ငံတွေကလည်း အင်္ဂလိပ်လက်အောက်မှာ နှစ်ပေါင်း ၁၀၀ ကျော်နေခဲ့ရတဲ့အတွက် မြန်မာတွေရဲ့ အင်္ဂလိပ်စာကျွမ်းကျင်မှု အဆင့်ဟာ သူတို့ထက် မြင့်တယ်လို့ ထင်နေကြတုန်း ပါပဲ။ တကယ်တော့ မြန်မာနိုင်ငံမှာ ဟိုတုန်းက ကျွန်ပညာရေးလို့ သမုတ်ခဲ့ကြတဲ့ အင်္ဂလိပ်ခေတ်ပညာရေး အငွေ့အသက်တွေ ကုန်ဆုံးကွယ်ပျောက်ခဲ့တာ ကြာလှပါပြီ။ ၁၉၆၁ခုနှစ် တော်လှန်ရေးကောင်စီ အာဏာရ ယူပြီးကတည်းက တိုင်းပြည်ရဲ့ပညာရေးကို တတ်စွမ်းသလောက်ဖာ ထေးပြုပြင်လာခဲ့ကြတာတောင် ခုထိဒေသတွင်း နိုင်ငံတွေကို ယှဉ်ပြိုင်နိုင်စွမ်းမရှိသေးပါဘူး။
မကြာသေးခင်က EF (အင်္ဂလိပ်စာပထမ)ဆိုတဲ့ နိုင်ငံတကာ အင်္ဂလိပ်စာသင်ကြားတဲ့ အဖွဲ့အစည်း တစ်ခုကနေ ကမ္ဘာ့နိုင်ငံပေါင်း ၈၈နိုင်ငံက ပြည်သူ သန်းပေါင်းများစွာရဲ့ အင်္ဂလိပ်စာ ကျွမ်းကျင်မှု အရည်အသွေး ကို စစ်ဆေးခဲ့ပြီး နိုင်ငံအလိုက်ရရှိခဲ့တဲ့ အဆင့်တွေကို အညွှန်းကိန်းတစ်ခုအနေနဲ့ ထုတ်ပြန်ခဲ့ပါတယ်။ သူ့ကို EPI( English Proficiency Index)လို့ခေါ်ပါတယ်။ ဒီအဖွဲ့အစည်းဟာ ၁၉၆၅ ခုနှစ်ကတည်းကစတင်ထူထောင်ခဲ့ပြီး အခုအချိန်မှာ နိုင်ငံပေါင်း များစွာမှာ ရုံးခွဲတွေဖွင့်လှစ် ဆောင်ရွက်နေတဲ့ လုပ်ငန်းဖြစ်ပါတယ်။
EFEPI မှာကျွမ်းကျင်မှုအဆင့်ကို အလွန်မြင့်၊မြင့်၊အသင့်အတင့်၊နိမ့်နဲ့အလွန်နိမ့်ဆိုပြီး အဆင့်၅ဆင့်ခွဲ ထားပါတယ်။ ကဲ၊ဒါဆိုရင် မြန်မာနိုင်ငံရဲ့ ကျွမ်းကျင်မှု အဆင့် ဘယ်လောက်ရှိ ပါသလဲ။ မြန်မာနိုင်ငံ ရဲ့အညွှန်း ကိန်းအဆင့်ကတော့ နိုင်ငံပေါင်း ၈၈ နိုင်ငံမှာ အဆင့် ၈၂ ရှိပြီး Very Low အဆင့်မှာရှိပါတယ်။ သူ့အောက်မှာ တော့ အဆင့် ၈၅ ရှိတဲ့ ကမ္ဘောဒီယားရှိပါတယ်။ အရာရာထိပ်ဆုံးနားမှာ အမြဲရှိတဲ့ စင်္ကာပူကတော့ ကမ္ဘာ့အဆင့် ၃မှာနေရာ ယူထားဒါကြောင့် အာဆီယံမှာတော့ နံပါတ် တစ်ဖြစ်ပါတယ်။ အာဆီယံထဲမှာ High အဆင့်ရတဲ့ နိုင်ငံနှစ်နိုင်ငံ ကတော့ ဖိလစ်ပိုင် ၁၄ နဲ့ မလေးရှား ၂၂ ဖြစ်ပါတယ်။ အာဆီယံထဲက Moderate အဆင့်ကိုရတဲ့ နိုင်ငံတွေကတော့ အဆင့် ၄၁ ရှိတဲ့ ဗီယက်နမ်၊အဆင့် ၅၁ ရှိတဲ့ အင်ဒိုနီးရှားနဲ့ အဆင့် ၆၄ ရှိတဲ့ ထိုင်းတို့ ဖြစ်ကြပါတယ်။
အရင်တုန်းက ထိုင်းတွေကို အင်္ဂလိပ်စာ သိပ်မကျွမ်းပါဘူးလို့ ထင်ခဲ့တာ အခုတော့ ဒါတွေ အတိတ်မှာကျန်ခဲ့ပါပြီ။ စီးပွားရေးတိုးတက်ဖို့ နိုင်ငံခြားရင်းနှီးမြှပ်နှံမှုတွေကို ဖိတ်ခေါ်၊ ခရီးသွား လုပ်ငန်းတွေကို အားပေးနေတဲ့အချိန်မှာ နိုင်ငံတကာနဲ့ အမီလိုက်ဖို့ ဆက်သွယ်ရေးကိရိယာတစ်ခုဖြစ်တဲ့ အင်္ဂလိပ်စာဟာ မြန်မာတွေ အတွက်အခက်အခဲ တစ်ခု၊ အတားအဆီးတစ်ခုထိတောင် ဖြစ်လာနေပြီလား။တကယ်တော့ ဒါဟာ အတားအဆီးမဟုတ်ပါဘူး။ဒါဟာ အောင်မြင်မှုဆီ ကို ကျော်နင်းသွားရမယ့် Stepping-stone တစ်ခုသာ ဖြစ်ပါ တယ်။ ကြိုးစားကြစမ်းပါ။

ကိုးကား။ EF EPI

Leave a comment

Your email address will not be published.